名古屋高山白川鄉櫻花飄雪自由行第1-2天: 名古屋羊神社

今次我地搭ANA航空, 用ANA藍天假期, 包兩晚酒店同機票, 比單獨買平少少, 要經旅行社買), 時間唔係太好, 下午機 (14:35)去早機 (09:40)返。國泰時間好d, 但我地太遲訂, 又係櫻花季節 (好在名古屋都唔係賞櫻熱點), 價錢貴左好多所以就訂ANA。
我地係香港已經跟東瀛遊買左昇龍道高速巴士票。

呢個車票好抵, 包名古屋去高山, 高山去白川鄉來回車票, 坐四次已經回晒本。另外亦都有北陸高山JR火車pass, 但係價錢貴d, 我地又唔會去到金澤咁遠, 所以就無買JR北陸pass。
落機後係機場搭名鐵線去名古屋站。機場名鐵線入口售票處隔離就係Meitetsu Travel Plaza Tourist Information, 係果度攞昇龍道高速巴士車票。要留意時間, 我地攞完之後佢就關門。

呢張係巴士票, 仲包來回機場名鐵火車, 但一定要係車票既三日入面用 (我地買三日票), 我地就無用機場果兩程, 因為買多兩日仲貴過來回機場名鐵火車票。

去名古屋玩一係住係名古屋站, jr同名鉄線同地鐵都會經。如果唔係就住係榮站, 但淨係地鐵經。榮站多酒店選擇, 好多百貨公司, 三越松坂屋都係榮站。因為我地係名古屋市時間短, 又要去高山, 犬山, 岡崎(要搭名鐵線), 所以就揀左住名古屋站, 方便d。

名古屋站好大, 東邊係名鐵百貨, 係買去高山嘅濃飛巴士/ 名鐵巴士票既地方 (Meitetsu Bus Center, 係三樓)。我地冇係香港預訂巴士票, 係機場又唔能夠預訂(想再問Meitutsu Travel Plaza 時已經關咗)。所以就去左名鐵百貨附近嘅名鐵巴士站(Meitetsu Bus Center, 係三樓)訂飛, 聽日去高山。要留意係jr站東同西邊巴士都會停站, 我地住係jr站的西邊所以就揀左jr站上車 (JR Tokai Bus Nagoya Station)。雖然都行得到去名鐵巴士站,但係都要行十分鐘。

JR Tokai Bus Nagoya Station同Esca地下街都係黃星位置, 即西口。

訂完巴士票我地就去左jr站西口既Esca地下街食好多書介紹既名古屋特有食品, 山本屋味噌烏冬。價錢都幾貴,同味道唔成正比,試下都可以。

我地住係jr站西邊既名鐵新上豪酒店, 樓下就係Big Camera, 一個專俾遊客購物, 主要賣電子產品,電器, 手錶等等既大型商舖。我地都買左隻baby g, 600蚊唔駛, 好抵。

因為係羊年既關係,我地就去羊神社攞個意頭。

今次行程會經的地鐵站(紅格)。

由名古屋站搭地鐵去上飯田站。去到上飯田站再行十五分鐘。

一出站會見到風來坊廣告牌。

轉入呢條細街

一路向前行會經過一條橋

跟住會見到7 11

再行一陣就會

見到羊神社

神社好細, 半個鐘都睇完。有好多羊既石像。許願祈福牌亦有羊係上面, 亦都有羊嘅御守買。

去完羊神社,我地就搭返地鐵去jr站攞行李搭巴士去高山。

上一頁

下一頁

名古屋高山白川鄉櫻花飄雪自由行行程概覽

名古屋高山白川鄉: 手信, 名物

名古屋人氣食品

高山人氣食品

我的Facebook專頁: https://www.facebook.com/SeaLandSkyWorldTravel